نجلاء فتحي شامل حسن، أم لأربع أطفال، وزوجة الصحفي “ياسر أبو العلا”، اللي اتقبض عليه يوم 10 مارس 2024، واختفى بعدها أكتر من 50 يوم، مفيش حد عارف هو فين، لا أهل، لا محامي، ولا حتى ورقة تقول هو راح فين!
نجلاء ما سكتتش، بدأت تدور على زوجها، تكتب بلاغات، تروح للنائب العام، تسأل، وتصرخ، وتدور زي أي زوجة على زوجها اللي مش عارفة عنه حاجة.
بس فجأة، يوم 28 إبريل 2024، قوات الأمن قبضت على نجلاء!
اختفت هي كمان لمدة 13 يوم، وبعدها ظهرت كمتهمة في القضية رقم 1586 لسنة 2024 حصر أمن الدولة العليا، بتهم زي “الانضمام لجماعة إرهابية” و”تمويل الإرهاب”.
نجلاء اللي كل همها تعرف جوزها فين، بقت متهمة!
والمصيبة إنها مش بس أم لأربع أطفال اختفى والدهم فجاة، لأ، دي كمان بترعى والدتها المصابة بالشلل، يعني مش بس هي اللي راحت، ده فيه بيت كامل اتكسر.
وكأن ده مش كفاية، اتقبض كمان على أخوها وأختها، ولاحقاً تم إخلاء سبيل أخوها، لكن نجلاء لسه محبوسة، بس علشان سألت سؤال: “جوزي فين؟”
دي مش بس حكاية نجلاء، دي حكاية كل ست ممكن تتحط مكانها وتدفع التمن، مش لأنها غلطت، لكن لأنها متمسكة بحقها في إنها تدور على زوجها اللى اتخطف منها بدون إبداء أي سبب أو مبرر قانوني.
