ليه بنقول «حقوق النساء»؟
ليه بنقول حقوق النساء، مع إن حقوق النساء هي في الأساس حقوق إنسان؟
لأن مجرد إن الحق موجود على الورق، مش معناه إن كل الناس قادرين يتمتعوا بيه بنفس الشكل.
النساء، عبر التاريخ وحتى اليوم، بيواجهوا تمييزًا وعنفًا وإقصاءً بيمنعهم من التمتع بحقوق أساسية لمجرد كونهم نساء.
وعشان كده، لما نتكلم عن حقوق النساء، إحنا مش بنطالب بحقوق إضافية، ولا بامتيازات خاصة، ولا بمعاملة تفضيلية.
إحنا بنسأل ببساطة:
هل النساء فعلًا بيتمتعوا بحقوق الإنسان على قدم المساواة؟
هل كل امرأة تقدر تعيش آمنة من العنف؟
هل تملك حقها في جسدها وقراراتها؟
هل تحصل على تعليم وعمل وأجر عادل؟
هل تقدر تشارك في صنع القرار والحياة العامة؟
هل صوتها مسموع من غير ما تتعرض للعنف أو التهديد أو الإقصاء؟
وهل تقدر توصل إلى العدالة والحماية لما تُنتهك حقوقها؟
لما الإجابة تكون «لأ» أو «مش دايمًا»، يبقى لازم نتكلم عن حقوق النساء بوضوح.
لأن تسمية المشكلة جزء من مواجهتها.
حقوق النساء ليست منفصلة عن حقوق الإنسان؛
حقوق النساء هي حقوق الإنسان، لكن التمييز ضد النساء جعل من الضروري أن نسلّط الضوء عليها، ونطالب بضمانها ومساءلة من ينتهكها. ومن هنا بتبدأ حملة «حق مش مِنّة».
خلال الحملة، هنفتح ملفات وقضايا مختلفة تخص النساء، ونستخدم المناسبات والأيام الدولية والحقوقية كمدخل لطرح أسئلة أساسية عن الحق، والتمييز، والعنف، والعدالة والمساواة.
مش هنقول للنساء: «خدي حقك لو اتسمح لكِ».
هنقول:
حقك مش مِنّة.
أمانك مش مِنّة.
حريتك مش مِنّة.
جسدك مش مباح.
صوتك مش أقل.
ومساواتك مش طلبًا زائدًا.
لأن الحقوق لا تُمنح للنساء كفضل من أحد.
الحقوق تُضمن للجميع، وتُحمى بالقانون والمساءلة والعدالة.
حق مش مِنّة.
لأن حقوق النساء حقوق إنسان
