المادة 531 من مشروع قانون الإجراءات الجنائية الجديد هي جزء من الباب اللي بيناقش إجراءات التحقيق والمحاكمة عن بعد (نظام الأون لاين)، وبتتكلم عن إنه المتهم بيحضر الجلسات الخاصة بيه بدون قيود أو أغلال، وده طبعاً أمر مهم جدا ومفروغ منه.
المشكلة في باقي المادة اللي بتتكلم عن تواجد المحامي والحضور مع المتهم الخاص بيه في مكان تواجده، وإنه في كل الأحوال لا يجوز الفصل بين المتهم ومحاميه أثناء إجراءات التحقيق والمحاكمة عن بعد.
وهنا بنلاقي المشكلة واضحة، السلطة هتحقق وتخلي المتهم يحضر جلساته سواء تجديد أو محاكمة أون لاين، طب والمحامي؟ المادة نصت إنه هيحضر معاه في مكان تواجده، يعني المحامين/ات هيباشروا أعمالهم/هن من داخل السجون والأقسام بدلاً من قاعات المحاكم والنيابة، مش بس كده لكن كمان هيكونوا تحت سلطان رجال السلطة العامة في الأماكن دي.
تقدروا تطّلعوا على نص المادة رقم 531 من مشروع قانون الإجراءات الجنائية الجديد:
نص المادة رقم 531 من مشروع قانون الإجراءات الجنائية: “يحضر المتهم الجلسة بغير قيود ولا أغلال، وتجري عليه الملاحظة اللازمة. ولمحامي المتهم مقابلته، والحضور معه في مكان تواجده، وأثناء إجراءات التحقيق والمحاكمة عن بعد. وفي جميع الأحوال لا يجوز الفصل بين المتهم ومحاميه أثناء اتخاذ تلك الإجراءات”.
