العنف ضد النساء مش مجرد حادث فردي… ولا مشكلة عائلية… ولا “شيء بيحصل في كل بيت” زي ما البعض بيقول.
العنف ضد النساء هو انتهاك صريح للحقوق الإنسانية الأساسية، وتهديد مباشر لحياة وأمان وحرية نصف المجتمع.
إيه هو العنف ضد المرأة؟
العنف ضد المرأة هو “أي فعل أو تهديد أو سلوك قائم على النوع الاجتماعي” يؤدي إلى:
– أذى جسدي
– أذى نفسي أو عاطفي
– أذى جنسي
– أذى اقتصادي
– تقييد حرية المرأة أو معاملتها بدون مساواة
– انتقاص من كرامتها أو حقوقها
وده سواءاً حصل داخل البيت، أو في الشغل، أو في الشارع، أو على الإنترنت.
أشكال العنف… اللي المجتمع أحيانًا بيطنّشها:
1) العنف الجسدي: زي الضرب، الدفع، التهديد بالسلاح، ترويع، أو أي شكل من أشكال الاعتداء البدني.
2) العنف النفسي والمجتمعي: زي الصراخ، الإهانة، التقليل من شأن المرأة، السخرية، الوصم واللوم، الضغط الاجتماعي، وإلزامها بالصمت خوفًا من “الفضيحة”. وده العنف اللي “مايسيبش علامة” لكن لكن يقدر يكسّر من جوّه.
3) العنف الاقتصادي: زي منعها تشتغل أو تتعلم، السيطرة على مرتبها، وكمان التحكم في حساباتها.
4) العنف الرقمي: زي التهديد، الابتزاز، مشاركة صور بدون إذن، التجسس، واختراق الحسابات، أو نشر مواد تصويرية ليها من غير إذن.
5) العنف الجنسي: وهو أي فعل أو محاولة إجبار على فعل جنسي -بدون موافقة حقيقية- سواء في البيت، في الشغل، أو في الأماكن العامة.
وطبعاً مش هننسى العنف اللي بيمارس من الدولة في حق الستات اللي بيعبروا عن آرائهم السياسية أو الاجتماعية، واللي حتى طالبوا بحقوقهم العادية في المعيشة، سواءً بالتنكيل بيهم، أو حبسهم، والانتهاكات اللي بيتعرضوا ليها داخل السجون.
العنف مش “موقف عابر”… العنف بيأثر على حياة المرأة، صحتها النفسية والجسدية، قدرتها على العمل، علاقتها بأهلها وولادها، وثقتها في نفسها.
ولأن كل مرة امرأة تتعرض للعنف وتسكت… المجتمع كله بيسكت معاها. ليه بنبدأ حملة الـ16 يوم؟عشان نقول: إن حياة المرأة مش مساحة مفتوحة للعنف إن حماية المرأة مش “خيار”… ده حق إن كل امرأة تستحق مساحة آمنة، صوت مسموع، واحترام كامل لإنسانيتها إن العنف مش سر… ومش “عيب”… ومش قضية تتحل بالسكوت
احنا هنا علشان نفتح مساحة آمنة… نسمع… نوعي… وندعم… ونقول إن كل امرأة تستحق حياة بلا خوف.
